بنودع سنة قديمة وبنستقبل سنة جديدة..أنا عن نفسي حبيت ابتدي السنة الجديدة ببلوج جديد وببوست جديد، وحبيت كمان اتكلم عن سنة 2011 اللي أغلب الناس فاكراها سنة "وحشة".
الصراحة انا مش شايف انها سنة وحشة خالص..بالعكس انا شايف انها سنة كويسة جدا، دا كفاية إننا عرفنا يعني ايه كرامة، يعني ايه عدالة، يعني ايه حرية، يعني ايه ثورة، الثورة اللي ماشفنهاش وماسمعناش عنها الا فالكتب والأفلام.
في السنة دي بس عرفنا قيمة البلد. واخيرا الواحد بقى يرفع علم بلده فخور ببلاده فعلا ومنتمي ليها بجد (مش عشان المنتخب فاز ببطولة)، سنة 2011 بالنسبة لي احسن سنة عشتها لاني شفت شعوب بتثور، شعوب بتقول عايزين نعيش، شعوب قالت بأعلى صوتها لحكامها لا، شعوب قهرت حاجز الخوف، مش خايفة من الموت. السنة دي قامت ثورات الربيع العربي اللي كان سببها بوعزيزي اللي حرق نفسه لانه مقدرش يستحمل كمية القهر والظلم اللي عاشه، قامت بسبه ثورة فتونس، بس شرارة الثورة ماوقفتش هناك،لا دي انتقلت لمصر وليبيا واليمن وسوريا، كلها طالبت باسقاط النظام، كلها بتطالب بعيش، بحرية، بعدالة اجتماعية، وبكرامة انسانية. بس دي مش المفروض تكون مطالب، دي حق من حقوق الشعب. حقي اني اعيش حر، حقي اني اعيش بكرامة، حقي اني اشوف العدل شيء عادي. حقوق بسيطة تخلي العالم كله يحترمني.
كل دا اتحقق سنة 2011،
الثورات العربية اللي علمتنا ازاي الشعب يقدر يجيب حقه قامت في 2011
صحيح ان ناس كتيرة ماتت عشان الحقوق دي، صحيح ان معظمنا بما فيهم انا بقى متشائم من كتر اللي حصل، بس كلنا متفقين على ان 2011 غيرت فينا كتير، انت اتغيرت وانا اتغيرت وكلنا اتغيرنا، اللي كان اهتمامه الوحيد الكورة بقى يهتم دلوقتي بالسياسة واحوال البلد، وتلاقي كل واحد فالقهوة مع صحابه يتكلموا فالسياسية (وان كان معظمه فتي).
لو قعدت تركز في عيوب رسمة حتطلع في نظرك وحشة و حتنسى مضمون الرسمة و محاسنها، نفس الحكاية في 2011، لو قعدت تركز في عدد الناس اللي ماتوا او الحاجات الوحشة اللي حصلت فيها حتكون بالنسبالك اسوء سنة وحتنسى الناس دي ماتت ليه، وان هما دلوقتي في مكان احسن من هنا، وحتنسى ان السنة دي عرفت اصحاب من خلال الثورة دي ممكن يكونوا احسن بكتير من صحابك التانيين، وحتنسى التغير الايجابي اللي حصلك السنة دي...دايما بص لنص الكوباية المليان...بص للصورة كلها قبل ماتحكم عليها.
وكل سنة وانتوا طيبين...
